Duff er ekki ómissandi

Jose Mourinho segist eiga gott sambandi við írska vængmanninn Damien Duff sem á dögunum var orðaður við grannaliðið Tottenham í London. Mourinho segir Duff vera góðan leikmann og góðan náunga, en bendir á að þó hann geti vel hugsað sér að halda honum í leikmannahópi sínum, sé hann ekki ómissandi.

"Við höfum mjög opin samskipti og við vitum báðir hver staðan er. Ég yrði ánægður ef ég héldi honum hérna áfram, en hann er ekki ómissandi," sagði Mourinho, sem vill ekkert tjá sig um þann orðróm að Chelsea ætli að gera tilboð í Ashley Cole, leikmann Arsenal. "Við höfum verið orðaðir við alla vinstri bakverði í Evrópu, svo þetta er ekkert nýtt. Ég tjái mig ekkert um það," sagði Mourinho, sem þegar hefur verið sektaður um stórfé fyrir að bera víurnar í enska landsliðsmanninn.