Portsmouth gerir tilboð í Nicolas Anelka

Franski framherjinn Nicolas Anelka segir að enska úrvalsdeildarfélagið Portsmouth hafi gert liði sínu Fenerbahce kauptilboð í sig upp á rúmar 8 milljónir punda. Hann segir ennfremur að Bolton og Blackburn hafi sýnt sér áhuga, en enn sem komið er sé Portsmouth eina liðið sem gert hafi formlegt tilboð.

Anelka segist gjarnan vilja spila í stærri deild en í Tyrklandi, en segir boltann algjörlega vera hjá forráðamönnum Fenerbahce. Hann segir Harry Redknapp, stjóra Portsmouth, hafa sett sig í samband við sig og hafi hug á að fá sig í ensku úrvalsdeildina. Anelka lék áður með Liverpool, Arsenal og Manchester City og þó enginn efist um hæfileika hans sem knattspyrnumanns, hefur hann haft orð á sér fyrir að vera illviðráðanlegur og fer gjarnan eigin leiðir.