Fulham kaupir Zakuani

Enska úrvalsdeildarfélagið Fulham hefur fest kaup á varnarmanninum Gabriel Zakuani frá Leyton Orient fyrir upphæð sem gæti numið allt að 1,5 milljónum punda. Zakuani hefur lengi verið undir smásjánni hjá Chris Coleman knattspyrnustjóra Fulham og hefur sá látið í veðri vaka að hann ætli að taka hressilega til í herbúðum sínum í sumar.

Þá er talið líklegt að Fulham selji sóknarmanninn Collins John til 1. deildarliðsins Birmingham á næstunni, en þó er ekki víst að John sé til í að fara niður um deild. Coleman er sagður tregur til að selja John, en er þó ekki á eitt sáttur við hann vegna trega hans til að spila á vængnum í stað þess að spila í framlínunni.