Hneykslið keyrði okkur áfram

Harðjaxlinn Gennaro Gattuso hjá ítalska landsliðinu segir að knattspyrnuhneykslið heima á Ítalíu hafi gefið liðinu aukinn styrk og þjappað því saman á HM. Nú í vikunni fá fjögur af stórliðunum á Ítalíu að vita örlög sín í kjölfar spillingarmálsins stóra og mun dómurinn hafa úrslitaþýðingu fyrir framtíð margra af leikmönnum landsliðsins.

"Ég efast um að við hefðum orðið heimsmeistarar ef þetta mál hefði ekki verið efst á baugi og það hefur orðið til þess að efla okkur mikið sem lið. Nú bíðum við allir milli vonar og ótta að frétta hvað verður í framhaldinu. Það var ótrúleg tilfinning að vinna heimsmeistaratitilinn og mig langar að tileinka hann fólkinu sem er ekki á meðal okkar lengur - fólki eins og ömmu minni og afa sem gerðu mig að þeim manni sem ég er í dag," sagði Gattuso.