Hvað sagði Marco Materazzi?

Miklar vangaveltur hafa nú staðið yfir í allan dag um hvað það var sem varnarmaðurinn Marco Materazzi hjá ítalska landsliðinu sagði við Zinedine Zidane í úrslitaleiknum á HM í gærkvöldi, sem varð þess valdandi að Zidane réðist á hann og skallaði hann. Menn sem tengjast Zidane vilja lítið tjá sig um málið, en þó eru einhverjir sem telja sig vita hvað Materazzi sagði við hann.

Zidane hefur alfarið neitað að tjá sig um málið, enda hefur hann eflaust nóg að gera við að sætta sig við að hafa misst stjórn á skapi sínu í síðasta landsleik sínum með franska landsliðinu - sjálfum úrslitaleiknum á HM.

Umboðsmaður Zidane segist hafa rætt við hann í gærkvöld og segir miðjumanninn hafa gefið þá skýringu að hann hefði misst stjórn á sér vegna einhvers sem Materazzi lét út úr sér, en vill ekki gefa upp hvað það er. Heimildamenn í Frakklandi halda því fram að Materazzi hafi sagt eitthvað um móður Zidane, en það hefur ekki fengist staðfest.

"Ég veit ekki hvað Materazzi sagði, en þó Zidane sé ýmsu vanur, var þetta eitthvað sem fyllti mælinn hjá honum. Hann er mjög leiður yfir þessu atviki og vildi sannarlega ekki enda feril sinn á þennan hátt," sagði umboðsmaðurinn.