Ætlar ekki að taka við Bandaríkjamönnum

Jurgen Klinsmann hefur farið þess á leit við fjölmiðla sem aðra, að vera ekki settur undir pressu til að ákveða framtíð sína. Klinsmann hefur mikið verið orðaður við stöðu landsliðsþjálfara Bandaríkjanna, en öfugt við almenningsálitið fyrir HM, virðist hann nú njóta stuðnings bæði þýsku þjóðarinnar og landsliðsins um að halda áfram í starfi.

"Þegar öllu er á botninn hvolft, er þetta spurning um fjölskylduna og ekkert annað. Ég vil helst ekki vera settur undir pressu með ákvörðun mína um hvað gera skuli í framhaldinu. Ég er djúpt snortinn yfir því hrósi sem ég hef fengið fyrir störf mín en ég mun taka ákvörðun um framhaldið í samráði við fjölskylduna," sagði Klinsmann.