Verðum að gæta okkar á Portúgölunum

Varnarmaðurinn William Gallas hjá Chelse og franska landsliðinu, segir að hann og félagar hans verði að vera vel á verði í leiknum gegn Portúgölum í undanúrslitum HM á morgun. Hann segir Portúgalina vera þolinmóða og duglega að veiða mótherja sína í gildrur.

"Við verðum að halda fullri einbeitingu í 90 mínútur gegn Portúgal, því annars getur farið illa. Þeir eru mjög þolinmóðir og beita stundum bellibrögðum til að taka andstæðinginn út af laginu. Stundum láta þeir sig detta og reyna að fiska gul spjöld á andstæðinginn, en maður vonar að dómarinn láti slíkt ekki hafa áhrif á sig," sagði Gallas.