Mætum til leiks eins og öskrandi ljón

Jurgen Klinsmann segir sína menn heldur betur tilbúna í hinn erfiða leik við Argentínumenn í 8-liða úrslitunum á HM á morgun. Þjóðverjar hafa verið í miklu stuði það sem af er móti á heimavelli sínum og segir Klinsmann þá ætla að láta Argentínumennina finna fyrir því á morgun.

"Við erum tilbúnir í þennan leik og skiljum allt eftir á vellinum. Liðið er fullt sjálfstrausts og ætlum að keyra á Argentínumennina strax í byrjun. Við mætum til leiks af hörku og ástríðu og gaman verður að sjá hvernig þeir bregðast við því," sagði Klinsmann, sem á nú hug og hjörtu allra Þjóðverja eftir að hafa verið gagnrýndur harðlega í upphafi móts.