Brassar áfram

Brasilíumenn tryggðu sér í dag farseðilinn í 8-liða úrslitin á HM með 3-0 sigri á Gana. Ronaldo kom þeim yfir eftir aðeins fjórar mínútur og Adriano bætti við öðru marki rétt fyrir lok fyrri hálfleiksins. Það var svo Ze Roberto sem innsiglaði sigur Brasilíu með þriðja markinu á 83. mínútu, en skömmu áður hafði Asamoah Gyan verið rekinn af velli í liði Gana með sitt annað gula spjald.

Segja má að sigur Brasilíumanna hafi verið sanngjarn, en Ganamenn voru mun betri en lokatölurnar gefa til kynna og áttu nokkur góð marktækifæri. Þá var mark Adriano mjög vafasamt, því sýnt þótti að hann hefði verið kolrangstæður þegar hann skoraði annað mark Brassa og setti Afríkumennina með því í afar erfiða stöðu.

Brasilíumenn mæta annað hvort Spánverjum eða Frökkum í 8-liða úrslitum keppninnar, en þessar þjóðir eigast við í síðari leik kvöldsins sem sýndur verður beint á Sýn klukkan 19:00 í kvöld.