Liðið vex með hverjum leik

Markaskorarinn Lukas Podolski þakkaði öflugri liðsheild sigurinn á Svíum í 16-liða úrslitum HM í dag, en Podolski skoraði bæði mörk þýska liðsins eftir undirbúning frá Miroslav Klose. Þýska liðið var harðlega gagnrýnt fyrir frammistöðu sína allar götur þar til mótið hófst, en hefur sýnt allar sínar bestu hliðar og er komið í 8-liða úrslit.

"Það var vitað mál að þetta yrði erfiður leikur, en þegar við náðum að skora snemma, jókst sjálfstraustið til muna í liðinu. Við vorum vissulega heppnir að Larsson náði ekki að nýta vítaspyrnuna, en við vorum samt betra liðið í dag og áttum sigurinn skilinn. Liðið hefur vaxið jafnt og þétt síðan riðlakeppnin hófst og sjálfstraustið í hópnum er mikið," sagði Podolski.