Úkraína fylgir Spánverjum í 16-liða úrslitin

Spánverjar og Úkraínumenn eru komnir í 16-liða úrslitin á HM eftir að hafa unnið lokaleiki sína í riðlakeppninni í dag. Spánverjar lögðu Sáda 1-0 með marki Juanito í fyrri hálfleik og vafasöm vítaspyrna Andriy Shevchenko tryggði Úkraínumönnum sigur á Túnis og sendi Afríkumennina heim úr keppninni.

Spánverjar tefldu fram nokkuð breyttu liði gegn Sádum í dag, enda var liðið öruggt í næstu umferð keppninnar. Spænska liðið hafði tögl og haldir í fyrri hálfleiknum og hefði átt að skora fleiri mörk, en Sádar stríddu þeim í síðari hálfleiknum - án þess þó að ná að jafna leikinn.

Leikur Úkraínu og Túnis var aldrei mikið fyrir augað, en fyrirliði Úkraínu, stórstjarnan Andriy Shevchenko, tryggði þeim sigur með marki úr vítaspyrnu sem liðinu var dæmd á mjög vafasaman hátt. Túnisar léku manni færri hálfan leikinn og því var á brattann að sækja fyrir liðið.