Ástralar í 16-liða úrslit

Ástralar tryggðu sér í kvöld sæti í 16-liða úrslitum HM með því að gera 2-2 jafntefli við Króata í lokaleik þjóðanna í F-riðli. Dario Srna kom Króötum yfir með góðu marki beint úr aukaspyrnu, en Craig Moore jafnaði fyrir Ástrala úr vítaspyrnu skömmu fyrir leikhlé. Nico Kovac kom Króötum aftur yfir í síðari hálfleik, en Harry Kewell jafnaði metin skömmu fyrir leikslok og tryggði Áströlum sæti í 16-liða úrslitum.

Þetta er sannarlega eftirtektarverður árangur hjá lærisveinum Guus Hiddink, sem hafa með baráttu og harðfylgi náð lengra en nokkur þorði að vona. Þeim Simunic og Simic var vikið af leikvelli í liði svekktra Króata í blálokin og Brett Emerton fékk að fjúka sömu leið í liði Ástrala.