Portúgalar með fullt hús

Portúgalar lögðu Mexíkóa 2-1 í D-riðlinum á HM í dag. Sabrosa og Maniche skoruðu mörk Portúgala, en Fonseca minnkaði muninn fyrir Mexíkóa, sem klúðruðu vítaspyrnu í leiknum og léku manni færri frá 60. mínútu þegar Luiz Perez fékk sitt annað gula spjald fyrir leikaraskap.

Portúgalar vinna því riðilinn með fullt hús stiga eða 9 stig, Mexíkó hlaut 4 stig í öðru sæti, Angóla 2 stig og Íran 1. Íranar og Angólar skildu jafnir 1-1 í hinum leiknum í D-riðli. Amado Flavio kom Angóla yfir á 60. mínútu, en Sohrab Bakhitiarizadeh jafnaði skömmu síðar og gerði vonir Angóla um að komast í 16-liða úrslit að engu.