Klinsmann varar við of mikilli bjartsýni

Jurgen Klinsmann, landsliðsþjálfari Þjóðverja, segir liðið hafa náð settu marki með því að vinna riðil sinn á HM, en varar menn við of mikilli bjartsýni í framhaldinu.

"Strákarnir vita að þeir þurfa ekki að óttast nokkurt lið ef þeir spila sinn besta leik, en við verðum að hafa báða fætur á jörðinni engu að síður. Nú erum við komnir í 16-liða úrslit og þar líðast mönnum engin mistök," sagði Klinsmann og bætti við að sér væri nákvæmlega sama hvort lið hans mætti Svíum eða Englendingum í 16-liða úrslitunum.