Messi ekki með í opnunarleiknum

Undrabarnið Lionel Messi verður líklega ekki með í opnunarleik Argentínumanna á HM í næsta mánuði, en hann er enn að jafna sig af meiðslum á læri. Hann spilaði 15 mínútur fyrir Argentínu í æfingaleik í heimalandinu á dögunum, en á ekki von á að koma við sögu þegar Argentína mætir Fílabeinsströndinni í opnunarleik sínum í C-riðli á HM.

"Ég á ekki von á því að byrja strax að spila, því ég hef verið lengi frá vegna meiðslanna. Ég vona samt að ég nái mér fljótlega á strik til að hjálpa okkur að komast í úrslitaleikinn - þar sem ég vona að við mætum Brasilíu," sagði hinn 18 ára gamli leikmaður Barcelona.