Chimbonda segist vera á leið til Tottenham

Bakvörðurinn knái hjá Wigan, Pascal Chimbonda, segist viss um að hann muni ganga í raðir Tottenham í næstu viku. Wigan hefur þegar neitað þriggja milljón punda tilboði frá Tottenham í kappann og vill félagið fá meira en helmingi hærri upphæð fyrir hann.

"Ég hugsa að málið verði leyst á morgun eða laugardaginn. Ég hef ekki rætt við forráðamenn Tottenham, en það hefur umboðsmaður minn gert. Sem knattspyrnumaður vill maður alltaf ná lengra og ef ég fer til Tottenham er það skref í rétta átt fyrir mig. Ég er búinn að fá allt út úr vistinni hjá Wigan sem ég get og auðvitað væri gaman að fara til félags eins og Manchester United - en eins og staðan er í dag hefur aðeins Tottenham gert tilboð," sagði hinn hreinskilni Chimbonda.