Rooney á ekki að fara tæpur á HM

Sir Alex Ferguson hefur enn og aftur tjáð sig um að sér finnist það ekki góð hugmynd að fara með Wayne Rooney á HM þegar útlit er fyrir að hann verði alls ekki búinn að ná sér af fótbrotinu á dögunum.

Ferguson sagði í samtali við sjónvarpsstöð Manchester United, að það gerði hvorki Rooney sjálfum né enska landsliðinu mikinn greiða að senda hann á heimsmeistaramótið ef hann væri enn meiddur.

"Það má vel vera að sjónarmið okkar sé að nokkrum hluta byggt á eigingirni, en sjónarmið enska landsliðsins eru það nú líka. Wayne er okkar mikilvægasti leikmaður og við viljum að hann verði heill í upphafi næstu leiktíðar. Ég sé engan tilgang í því að fara með mann á 50% eða 75% heilsu á heimsmeistaramótið og sé ekki að það þjóni tilgangi," sagði Ferguson.