Jóhannes Karl sópaði til sín verðlaunum

Jóhannes Karl Guðjónsson fór ekki tómhentur heim af lokahófinu hjá Leiceister City í gærkvöldi, en hann kvaddi félagið með því að hirða verðlaun fyrir að vera leikmaður ársins bæði hjá stuðningsmönnum og félögum sínum í liðinu og fékk að auki verðlaun fyrir mark ársins.

"Mig langar að þakka strákunum í liðinu fyrir þennan heiður sem mér er sýndur og þetta er mér mikils virði. Gengi okkar í vetur var upp og ofan, en ég er viss um að Leicester kemst aftur í úrvalsdeildina fyrr en síðar," sagði Jóhannes í viðtali eftir að hafa tekið við verðlaununum, en hann mun sem kunnugt er ganga til liðs við hollenska liðið AZ Alkmaar í sumar - þar sem hann hittir fyrir landsliðsmanninn Grétar Rafn Steinsson.