Börnin grétu þegar ég datt út úr liðinu

Þýski markvörðurinn Jens Lehmann þakkar sonum sínum tveimur að stórum hluta bætta frammistöðu sína milli stanganna hjá Arsenal í vetur. Lehmann hefur verið ótrúlegur með liðinu í meistaradeildinni en ekki er langt síðan hann missti sæti sitt í byrjunarliðinu og sagðist þá hafa þurft að taka góða naflaskoðun.

"Þegar ég missti byrjunarliðssætið fór eldri sonur minn að gráta og spurði hvað yrði nú um okkur. Hann spurði hvort við þyrftum að flytja frá London og það fékk mikið á mig," sagði Lehmann. 

"Þetta fékk mig til að leggja enn harðar að mér á æfingum og ég ákvað að gefast ekki upp baráttulaust. Ég var staðráðinn í að sanna mig á ný og það tókst," sagði hann. Frammistaða Lehmann í vetur hefur verið frábær og fyrir vikið hefur hann bolað Oliver Kahn út úr byrjunarliði Þjóðverja fyrir HM í sumar.