Enska liðið verður lyfjaprófað fyrir HM

Nú hefur verið staðfest að allir leikmenn enska landsliðsins í knattspyrnu muni gangast undir lyfjapróf fyrir HM í Þýskalandi í sumar. Miklar deilur hafa staðið milli forráðamanna samtaka gegn lyfjanotkun og enska knattspyrnusambandsins fram að þessu, um hvernig standa eigi að lyfjamálum. Nú hafa stríðandi aðilar hinsvegar komist að niðurstöðu í málinu.

Alþjóða knattspyrusambandið (FIFA) hefur hingað til ekki vilja gangast við reglum sem Alþjóða lyfjaeftirlitið hefur sett um refsingar á hendur íþróttamönnum sem falla á lyfjaprófum. Stærsta ágreiningsmálið þar er að knattspyrnusambandið vill ekki gangast við því að leikmenn fái sjálfkrafa tveggja ára bann fyrir fyrsta brot - og vill fá að ráða refsingunni sjálft eins og verið hefur.