Pires hugsar málið

Franski miðjumaðurinn Robert Pires hjá Arsenal segist enn vera að íhuga samningstilboð frá spænska liðinu Villarreal sem Arsenal sló einmitt út úr meistaradeildinni í gær. Pires viðurkennir að það verði sér erfitt að yfirgefa herbúðir Arsenal eftir mörg góð ár, en segist þó hafa fundið fyrir frábæru andrúmslofti á heimaleik liðsins.

Pires er að íhuga tveggja ára samningstilboð spænska liðsins, en Arsenal vill aðeins framlengja um eitt ár. Arsene Wenger segist vona að Pires sjái að sér og verði eitt ár í viðbót hjá Lundúnaliðinu.