Dýrmætur sigur Birmingham

Lærisveinar Steve Bruce í Birmingham unnu gríðarlega mikilvægan sigur á Blackburn 2-1 á heimavelli sínum St. Andrews í kvöld og halda þar með í vonina um að forðast fall í fyrstu deildina. Nicky Butt kom heimamönnum yfir í leiknum, en fyrrum leikmaður Birmingham Robbie Savage jafnaði metin fyrir gestina. Það var svo finnski framherjinn Mikael Forssell sem skoraði sigurmark Birmingham á 86. mínútu eftir að hafa komið inn á sem varamaður.

Með sigrinum komst Birmingham upp af fallsvæðinu og er nú í 17. sæti deildarinnar með 32 stig eins og Portsmouth sem einnig hefur hlotið 32 stig, en Birmingham er með skárri markatölu. Blackburn missti af tækifæri til að komast upp að hlið Arsenal og er sem fyrr í 6. sæti deildarinnar.