Birmingham mætir Blackburn

Einn leikur er á dagskrá í ensku úrvalsdeildinni í knattspyrnu í kvöld þar sem Birmingham freistar þess að krækja í gríðarlega mikilvæg stig í botnbaráttunni. Blackburn er í baráttu um Evrópusæti og því er allt undir hjá lærisveinum Mark Hughes sömuleiðis. Steve Bruce, stjóri Birmingham, segir að aldrei komi til greina að segja af sér þó liðið falli niður í fyrstu deild.

"Það er mikil pressa á mér um þessar mundir, en þó ég sé ekki sérstaklega hrifinn af pressu, hefur mér hingað til tekist ágætlega að standa hana af mér," sagði Bruce. Leikurinn í kvöld verður merkilegur fyrir þær sakir að þá snýr Robbie Savage aftur á gamla heimavöllinn sinn og á líklega von á að fá óblíðar móttökur frá stuðningsmönnum Birmingham.