Við erum ekki sloppnir enn

Harry Redknapp var hógvær eftir sigur sinna manna í Portsmouth á Middlesbrough í dag, en liðið komst með sigrinum þremur stigum frá fallsvæðinu. Portsmouth hefur unnið fjóra af sex síðustu leikjum sínum og virðist sannarlega líklegra til að bjarga sér frá falli en Birmingham eða West Brom eins og staðan er í dag.

"Við höfum verið á góðum spretti undanfarið en enn getur allt gerst í þessu, baráttan í neðri hlutanum er enn hnífjöfn og spennandi. Það sem mestu máli skiptir er að við höfum komið okkur í aðstöðu til að halda okkur uppi með góðum spretti. Við höfum krækt í 14 af 18 mögulegum stigum í síðustu leikjum og nú er bara að halda áfram á sömu braut og sjá svo hvar við stöndum eftir síðasta leikinn," sagði Redknapp.