Við erum ekki farnir að dansa ennþá

Jose Mourinho er enn með báða fætur á jörðinni þrátt fyrir að hans menn þurfi aðeins fjögur stig úr síðustu fjórum leikjum sínum til að tryggja sér annan Englandsmeistaratitilinn í röð, en hann tók sér þó tíma til að hrósa fyrirliða sínum eftir sigurinn á Bolton í dag.

"Ég er sannfærður um að við náum að klára dæmið, en ég syng hvorki né dansa ennþá og það gera leikmenn mínir ekki heldur," sagði Mourinho. "Nú snúum við okkur bara að næsta leik og þurfum fjögur stig úr fjórum síðustu leikjunum," bætti hann við og hrósaði fyrirliða sínum, varnarmanninum John Terry, sem komst á blað í markaskorun í leiknum. "Hann er einfaldlega besti leikmaður í heimi í sinni stöðu og hugarfar hans er frábært."

Bolton hefur nú tapað fimm leikjum í röð og er Evrópudraumur liðsins að breytast í martröð á lokasprettinum.