Eiður ekki með gegn Bolton

Eiður Smári Guðjohnsen er ekki í leikmannahópi Chelsea sem heimsækir Bolton í ensku úrvalsdeildinni í knattspyrnu í dag en leikur liðanna hófst á Rebook stadium nú fyrir hádegið. Þetta er annar leikurinn í röð hjá Chelsea þar sem Eiður er ekki í hópnum hans Jose Mourinho en ekki er sérstaklega vitað til þess að um veikindi eða meiðsli sé að ræða í tilfelli Eiðs.

Chelsea getur með sigri í dag náð 9 stiga forskoti á toppi deildarinnar þegar aðeins fjórar umferðir eru eftir og þannig nánast tryggt sér Englandsmeistaratitilinn annað árið í röð. Man Utd sem er í 2. sæti náði aðeins að gera markalaust jafntefli við Sunderland í gærkvöldi sem þýðir að vonir um að ná Chelsea eru nánast úr sögunni.