Þetta var ekki gáfulegt hjá honum

Harry Redknapp var mjög ánægður með að ná jafntefli við Arsenal í ensku úrvalsdeildinni í kvöld eftir að hans menn lentu undir snemma leiks, en hann var ekki jafn hrifinn af markaskorara sínum Lomana Lua Lua, sem sneri sig á ökkla og þurfti að fara meiddur af velli eftir heljarstökkin sín frægu í fangaðarlátunum.

"Þetta var sannarlega ekki það gáfulegasta sem hann hefur gert, en þetta erum minniháttar meiðsli og hann verður orðinn fínn um helgina. Annars er ég nokkuð sáttur við stigið í kvöld, því það er erfitt að koma til baka gegn liði eins og Arsenal. Þetta var mikilvægt stig - en við eigum enn mikið verk fyrir höndum," sagði Redknapp.

Arsene Wenger var ekki jafn sáttur með eitt stig, því hans menn misstu af tækifæri til að minnka bilið milli sín og granna sinna í Tottenham niður í eitt stig í baráttunni um meistaradeildarsætið. Arsenal fór skelfilega illa með nokkur dauðafæri í leiknum.

"Við héldum boltanum vel, en þegar maður nýtir ekki færin sín endar oft illa eins og í kvöld. Þegar færin sem við fengum eru borin saman við færin sem þeir fengu, getum við ekki annað en verið ósáttir við niðurstöðuna," sagði Wenger.