Heldur Fowler í heljargreipum

Rafa Benitez hefur nú sett nokkuð mikla pressu á sóknarmanninn Robbie Fowler og hefur gefið það í skyn að leikmaðurinn verði að sanna sig svo um munar á næstu þremur til fjórum vikum ef hann ætli sér að eiga möguleika á að tryggja sér áframhaldandi samning við félagið.

"Ég er búinn að útskýra málið fyrir Robbie. Hann veit að það eru tveir möguleikar í stöðunni - að hann verði hér hjá okkur áfram eða finni sér nýtt félag til að spila fyrir. Hann veit til hvers við ætlumst af honum og því verður hann að halda áfram að leggja sig allan fram og komast í eins gott form og kostur er. Hann veit að við þurfum að taka ákvörðun um framtíð hans fljótlega, en það sem við viljum vita er það í hvernig formi hann verður á næstu leiktíð," sagði Benitez, sem segist nokkuð ánægður með Fowler það sem af er veru hans á Anfield.