Hasselbaink svartsýnn

Hollenski framherjinn Jimmy Floyd Hasselbaink hjá Middlesbrough er ekki bjartsýnn á að verða boðinn nýr samningur hjá félaginu, en núverandi samningur hins 34 ára gamla leikmanns rennur út í sumar.

"Eins og staðan er í dag er ekkert sem bendir til þess að þeir vilji halda mér hérna lengur en ég vona að eitthvað gerist í sumar. Ég vil gjarnan vera áfram hjá Middlesbrough en hlutirnir gerast hratt í fótboltanum og ef þeir vildu halda mér hérna lengur, væru þeir eflaust löngu búnir að tala við mig," sagði Hasselbaink sem segist búast fastlega við því að Boro sé á höttunum eftir yngri sóknarmanni til að fylla skarð hans.