Chelsea er að undirbúa samningstilboð

Umboðsmaður franska varnarmannsins William Gallas hjá Englandsmeisturum Chelsea segir að félagið sé nú að undirbúa samningstilboð handa varnarmanninum, sem hefur verið orðaður við mörg af stóru liðunum á meginlandi Evrópu á undanförnum mánuðum. Gallas hefur verið ósáttur við að fá ekki að spila uppáhaldsstöðuna sína á vellinum með Chelsea, en umboðsmaður hans telur að Chelsea muni bjóða honum vænlega framlengingu á næstunni.

"Ég veit ekki hvað mun gerast á næstunni en greinilegt er að menn verða að setjast niður og ræða málin því William á aðeins eitt ár eftir af samningi sínum. Ég á von á að heyra frá Chelsea fljótlega og þá munum við setjast niður og skoða málið, því fjöldi liða hefur mikinn áhuga á því að semja við hann," sagði umboðsmaðurinn í samtali við Sky Sports.