Við getum náð Chelsea

Franski framherjinn Louis Saha hjá Manchester United segir að liðið hafi alla burði til að ná Chelsea að stigum á lokasprettinum í ensku úrvalsdeildinni, en United hefur verið á mikilli siglingu undanfarið á meðan Chelsea hefur verið að tapa stigum.

"Sigurinn á Bolton var gríðarlega mikilvægur fyrir okkur og við ætlum okkur að halda áfram að setja pressu á Chelsea. Við trúum að við getum náð þeim og verðum bara að halda áfram á sömu braut og vona að Chelsea haldi áfram að misstíga sig," sagði Saha sem hefur verið iðinn við kolann í markaskorun undanfarið. Manchester United og Chelsea mætast svo í deildinni í lok mánaðarins.