Solano óttast Chelsea

Chelsea tekur á móti Newcastle í átta liða úrslitum enska bikarsins í kvöld og verður leikurinn sýndur í beinni útsendingu á Sýn klukkan 19:35. Nolberto Solano, leikmaður Newcastle, óttast að leikmenn Chelsea muni mæta til leiks eins og öskrandi ljón eftir tapið gegn Fulham í deildinni um helgina.

Newcastle hefur ekki unnið á Stamford Bridge í 20 ár, en Glenn Roader stjóri Newcastle, var einmitt í liðinu í nóvember árið 1986 þegar það gerðist síðast.

"Við vitum sannarlega við hverju við eigum að búast frá liði Chelsea í kvöld, ekki síst frá stjóra þeirra. Fulham sýndi að það er vissulega hægt að leggja Chelsea - en sá leikur gerir það bara að verkum að við eigum ennþá erfiðara verkefni fyrir höndum. Chelsea tapar sjaldan tveimur leikjum í röð, en það er okkar að sjá til þess að það gerist. Við verðum að spila vel saman sem lið og megum ekki leyfa þeim að stjórna hraðanum," sagði Solano.