Í skýjunum með tvennuna

Dean Ashton framherji West Ham var skiljanlega í skýjunum með mörkin sín tvö gegn Manchester City í ensku bikarkeppninni í gærkvöldi. Hamrarnir unnu leikinn 2-1 og eru komnir í undanúrslit keppninnar.

"Þetta er augljóslega alveg frábært, það var erfitt að spila leikinn og City-menn gáfu sig alla í leikinn. Við erum bara ánægðir með að komast áfram, mér er alveg sama hvernig mörkin líta út. Undanúrslitin verða frábær, stuðningsmenn okkar munu flykkjast með okkur í þúsundatali til að styðja við okkur," sagði Ashton sem kostaði West Ham 7 milljónir punda.