Jóhannes Karl skoraði tvö fyrir Leicester

Jóhannes Karl Guðjónsson var hetja sinna manna í Leicester og skoraði tvö mörk þegar liðið sigraði Hull, 3-2 í ensku 1. deildinni í fótbolta í dag. Mörk Jóa Kalla komu bæði í seinni hálfleik en hið síðara reyndist sigurmarkið og kom 7 mínútum fyrir leikslok. Jóhannes lék allan leikinn í liði Leicester.

Reading náði 14 stiga forystu á toppi deildarinnar með 3-0 sigri á Burnley á útivelli. Brynjar Björn Gunnarsson og Ívar Ingimarsson léku báðir allan leikinn með Reading.

Gylfi Einarsson var ekki í leikmannahópi Leeds sem vann Crystal Palace 2-1 og Hannes Þ. Sigurðsson var heldur ekki í hópnum hjá Stoke sem tapaði fyrir Norwich 2-1.

Reading er efst í deildinni með með 89 stig, Sheffield Utd. í 2. sæti með 75 stig og Leeds í 3. sæti með 69 stig.