Á batavegi eftir meiðslin

Momo Sissoko leikmaður Liverpool er á batavegi eftir meiðslin sem hann hlaut í Meistaradeildarleiknum gegn Benfica fyrir réttri viku. Sissoko meiddist illa á auga en alltaf berast betri og betri tíðindi af Malíbúanum.

Líklegt er að Sissoko spili ekkert meira með á tímabilinu en hann sér ekkert út úr hægri auganu eftir að Beto sparkaði í andlit hans í leiknum sem Benfica vann 1-0. Beto hefur beðist afsökunar á atvikinu en um óviljaverk var að ræða.

"Læknarnir sem skoðuðu Momo í gær voru mjög ánægðir með bata hans," sagði talsmaður Liverpool í gær en það eru frábær tíðindi fyrir Evrópumeistaranna. Sissoko hefur spilað einkar vel á tímabilinu en hann kom til Liverpool frá Valencia á Spáni.