Ferguson ver ákvörðun sína

Sir Alex Ferguson hefur þótt ástæða til að verja þá ákvörðun sína að hafa Ruud van Nistelrooy á varamannabekknum í sigri liðsins á Wigan í úrslitaleik enska deildarbikarsins í gær.

"Ruud var auðvitað vonsvikinn að fá ekki að spila í gær, en þannig á það líka að vera. Ég lenti sjálfur í því sem leikmaður á sínum tíma að þurfa að sitja á bekknum í úrslitaleik þó ég væri markahæstur í mínu liði. Mér þótti bara rétt að leyfa Saha að spila, því hann var búinn að vera sjóðandi heitur í bikarnum og ég get ekki horft framhjá því," sagði Ferguson, en eins og kom á daginn hafði ákvörðun stjórans lítið að segja með útkomuna því United vann auðveldan 4-0 sigur í leiknum.