Ólæti stuðningsmanna fordæmd

Úrvalsdeildarlið Manchester United og Liverpool hafa gefið frá sér sameiginlega yfirlýsingu þar sem þau harma viðbrögð stuðningsmanna Liverpool sem veittust að sjúkrabifreiðinni sem flutti Alan Smith á sjúkrahús eftir að hann meiddist mjög alvarlega í leik liðanna.

"Við hörmum það sem átti sér stað eftir að Smith var borinn út í sjúkrabifreiðina eftir leikinn, en við viljum árétta að þarna voru ekki stuðningsmenn Liverpool á ferðinni - heldur hálfvitar sem er alveg sama um knattspyru og vilja bara eyðileggja fyrir fólki. Stuðningsmenn Liverpool risu úr sætum og klöppuðu fyrir Smith þegar hann var borinn af velli til að sýna stuðning sinn og við óskum honum alls hins besta," sagði í yfirlýsingu frá Liverpool.