Hefur mikinn áhuga á að taka við Newcastle

Claudio Ranieri, fyrrum knattspyrnustjóri Chelsea, segist hafa mikinn áhuga á að snúa aftur til Englands, en hann hefur nú verið sterklega orðaður við stjórastöðuna hjá Newcastle.

Ranieri stýrði Chelsea á árunum 2000-2004 og náði ágætum árangri, en hefur síðan stýrt Valencia á Spáni þar sem hann var rekinn eftir aðeins 8 mánuði. "Mig hefur alltaf langað að koma aftur til Englands og af þeim deildum sem ég hef starfað við, er enski boltinn langskemmtilegastur vegna áhuga og ástríðu stuðningsmannanna," sagði Ranieri, sem segir engann hafa haft samband við sig frá Newcastle.