Shearer spilar góðgerðaleik í vor

Gamla kempan Alan Shearer hjá Newcastle hefur komið á fót sérstökum fjáröflunarleik milli Newcastle og Glasgow Celtic frá Skotlandi sem fram fer á St. James´ Park þann 10. maí í vor, þar sem allt fé sem safnast mun renna til góðgerðamála.

Shearer ætlar sem kunnugt er að leggja skóna á hilluna eftir að þessari leiktíð lýkur og skoraði sitt 200. mark fyrir félagið fyrir skömmu. "Þetta verður ágætis leið fyrir mig til að kveðja fólkið og það er frábært að geta látið eitthvað af hendi rakna til fólks sem hefur ekki notið sömu gæfu og ég í leiðinni," sagði Shearer, sem hefur verið duglegur að gefa fé til góðgerðamála á ferlinum.