Sjö marka sigur Arsenal

Liverpool vann 1-0 sigur á Tottenham í ensku úrvalseildinni í knattspyrnu nú síðdegis og saxaði á forskot Man Utd niður í eitt stig. Liverpool er í 3. sæti deildarinnar með 44 stig og á tvo leiki til góða á Man Utd þannig að liðið stendur vel að vígi í baráttunni um 2. sætið. Harry Kewell skoraði eina mark leiksins á 59. mínútu.

Arsenal var þó í aðalhlutverki á Englandi í dag en liðið tók Middlesborough í bakaríið, 7-0 þar sem Thierry Henry skoraði þrennu. Philippe Senderos, Robert Pires, Gilberto Silva og Aleksander Hleb skoruðu hin mörkin.

Heiðar Helguson lék allan leikinn með Fulham sem lagði Newcastle 1-0, sömuleiðis Hermann Hreiðarsson í liði Charlton sem lagði Birmingham 2-0.

Önnur úrslit í úrvalsdeildinni urðu;

Aston Villa-West Ham 1-2

Portsmouth-Everton 0-1

Chelsea er enn efst með 58 stig og mætir botnliði Sunderland á morgun. 52 stig skilja liðin að. Tottenham er í 4. sæti með 40 stig en Arsenal sem lagaði markatölu sína í dag til muna kemur í 5. sæti þremur stigum á eftir og á leik til góða á Spurs.