Búið að samþykkja tilboð í Pandiani

Birmingham er nú búið að staðfesta að það hafi samþykkt tilboð Espanyol upp á eina milljón punda í sóknarmanninn Walter Pandiani og á hann því aðeins eftir að standast læknisskoðun og semja um kaup og kjör við spænska liðið.

Kaup Birmingham á Chris Sutton á dögunum urðu þess valdandi að Pandiani færðist neðar í goggunarröðina hjá félaginu og því ákváðu forráðamenn liðsins að leyfa honum að fara til Spánar.

"Walter hefur ekki alveg náð að standa undir væntingum hjá okkur síðan við keyptum hann, en hann hefur engu að síður náð að skora nokkur mjög mikilvæg mörk fyrir okkur og hefur hagað sér eins og sannur atvinnumaður síðan ljóst var að hann færi kannski aftur til Spánar," sagði David Sullivan, einn eigenda Birmingham.

Birmingham keypti Pandiani fyrir 3 milljónir punda frá Deportivo la Coruna á sínum tíma, en fær aðeins brot af þeim peningum til baka fyrir hann nú.