Tæknileg mistök voru klaufaleg

„Þetta var klaufalegt orðalag hjá mér," segir Árni Johnsen, 2. maður á framboðslista Sjálfstæðisflokksins í Suðurkjördæmi fyrir alþingiskosningar næsta vor. Árni hefur mætt talsverðum andbyr eftir að hann lýsti afbrotum sínum sem „tæknilegum mistökum".

Aðspurður hvort einhver úr Sjálfstæðisflokknum hafi fært í tal við hann sjálfan óánægju með stöðu hans á framboðslistanum svarar Árni neitandi. Sjálfur sé hann ekki að íhuga breytingar á sínu framboði: „Þetta bara liggur fyrir." Árni segir engan bilbug vera á baklandi hans: „Ég fæ bara jákvæða hluti þar."