Með 220 grömm af hassi innvortis

Karlmaður á þrítugsaldri var dæmdur í 30 daga óskilorðsbundið fangelsi í Héraðsdómi Reykjavíkur í gær fyrir fíkniefnasmygl.

Maðurinn var handtekinn á Keflavíkurflugvelli í ágúst vegna grunsemda um að hann hefði fíkniefni í fórum sínum. Hann var fluttur á lögreglustöðina við Hverfisgötu þar sem kom í ljós að hann hafði tæp 220 grömm af hassi falin innvortis. Maðurinn játaði brot sín skýlaust og því þótti 30 daga fangelsi hæfileg refsing. Hann hefur áður komið við sögu lögreglu vegna fíkniefnabrota.