Stóru flokkarnir myndi stjórn

Jiri Paroubek, leiðtogi tékkneskra jafnaðarmanna, hefur lagt til að mynduð verði samsteypustjórn síns flokks og höfuðkeppinautarins, íhaldsflokksins ODS. Það sé eina færa leiðin út úr pattstöðunni sem ríkt hefur í stjórnmálum landsins frá því kosið var til þings í sumar, en þeim lyktaði þannig að pólitísku fylkingarnar fengu nákvæmlega jafnmarga þingmenn, hundrað hvor.

Mirek Topolanek, leiðtogi ODS, sem fór fyrir minnihlutastjórn sem féll í atkvæðagreiðslu um trausts­yfirlýsingu, tjáði sig ekki um tillöguna. Flokkur hans hafði áður hafnað hugmyndinni.