Jónsi fallegastur en Bubbi galar hæst

Árleg sýning eigenda- og ræktendafélags landnámshænsna var haldin á Hrafnagili í ágúst. Alls voru sýndir um sjötíu fuglar. Um sjö hundruð manns tóku þátt í vali á fallegustu fuglunum og voru úrslit þau að Grána þótti fallegasta hænan en Jónsi í svörtum fötum fallegasti haninn.

Verðlaunahænan er í eigu Atla Vigfússonar á Laxamýri en Jónsi í svörtum fötum er í eigu Einars Gíslasonar á Brúnum í Eyjafirði. Dætur Einars nefndu hanann eftir söngvaranum góðkunna, sem er í miklu uppáhaldi.

Þetta er afskaplega mikill heiður fyrir hanann, segir Einar og bætir við: Jónsi deilir konungsdæmi sínu og 30 hænum með öðrum hana, Edda, sem er nefndur eftir nágrannakonu minni. Jónsi er miklu meira númer en Eddi og það hefur auðvitað ekkert minnkað í honum fílingurinn eftir kosninguna.

Einar, sem kennir við Hrafnagilsskóla, segir hænsnaræktunina aðallega vera skemmtilegt hobbí. Það er þó staðreynd að það eru miklu betri eggin úr landnámshænunum og svo eru þær miklu viljugri að liggja á en ræktuðu hænsnin. Það er búið að rækta alla móðurtilfinningu úr þeim.

Á landnámshænsnasýningunni voru hanar einnig raddmældir. Myndaðist gífurlegur hávaði á sýningarsvæðinu þegar fimmtán hanar göluðu hver í kapp við annan. Af mörgum kröftugum hönum reyndist Bubbi raddsterkasti hani landsins. Gal hans mældist 96 desibil, sem er svipaður hávaði og inni á meðal diskóteki. Eigandi Bubba er Ingi V. Gunnlaugsson í Ólafsfirði.