Steve Forbes til landsins

Athafnamaðurinn Steve Forbes er væntanlegur til landsins. Forbes, sem er aðaleigandi, forstjóri og ritstjóri viðskiptatímaritsins Forbes, mun halda fyrirlestur þann 6. febrúar næst­komandi. Einar Bárðarson, umboðsmaður og tónleikahaldari, stendur fyrir komu hans til landsins.

Fyrirlesturinn er liður í fyrirlestraröðinni Stefnumót við leiðtoga. Meðal annarra fyrirlesara í þeirri röð er Mikhail Gorbachev sem mun tala í Háskólabíói þann 12. október.

Steve Forbes er forstjóri og stjórnarformaður útgáfurisans Forbes Inc. en það gefur út eitt útbreiddasta viðskiptatímarit í heimi, Forbes. Samanlagt selst það að jafnaði í níu hundruð þúsund eintökum í Bandaríkjunum og nær til um fimm milljóna lesenda á heimsvísu á átta tungumálum.

Forbes sóttist eftir útnefningu Repúblikanaflokksins til forsetaframboðs árin 1996 og 2000 án árangurs. Í fyrra skiptið tapaði hann fyrir Bob Dole en í það seinna fyrir George W. Bush, núverandi Bandaríkjaforseta. Forbes hefur einnig verið einn helsti ráðgjafi bandarískra stjórnvalda í málefnum fjölmiðla.