Með fíkniefni í foreldrahúsum

Tveir voru teknir fyrir helgi í heimahúsi í Reykjavík með áttatíu grömm af hassi og fjörutíu af hvítu efni, væntanlega amfetamíni. Einnig fundust peningar sem lögregluna grunar að hafi fengist með dópsölu. Annar mannanna er nítján og hinn 25 ára.

Lögregluna grunar að efnin hafi átt að selja um verslunarmannahelgina, en veit ekki á hvaða leið mennirnir voru. Hún fann efnin við húsleit hjá öðrum þeirra. Hann býr í foreldrahúsum í austurborginni.

Lögreglan varðist frétta af því hvernig hún komst á spor piltanna eða hvaðan þeir fengu efnin, þar sem málið er í rannsókn.