Hill verður sóttur til saka

Hinn tvítugi varnarliðsmaður, Calvin Hill, sem grunaður er um morðið á flug­liðanum Ashley Turner þann 14. ágúst á varnarsvæðinu í Keflavík, verður sóttur til saka fyrir morðið, en verjendur hans höfðu reynt að fá málinu vísað frá vegna formgalla.

Hill er ákærður fyrir morð að yfirlögðu ráði, þjófnað og ólögmæta eignaupptöku. Einnig fyrir að setja fram ósannar opinberar fullyrðingar, að taka sér leyfi í heimildarleysi og koma í veg fyrir framgang réttvísinnar.

Turner átti, viku fyrir dauða sinn, að bera vitni gegn Hill fyrir að taka út 2000 dollara, um 150 þúsund krónur, af bankareikningi hennar. Ekki hefur verið ákveðið hvenær málið verður tekið fyrir.