Fóru í gegnum varnargirðingu

Lögreglunni í Bolungarvík var tilkynnt um töluvert grjóthrun úr Óshlíðinni um eittleytið í fyrrinótt.

Þegar lögregla kom á staðinn sá hún hvar fjórir stórir hnullungar lágu á veginum. Að sögn lögreglu voru steinarnir um einn og hálfur metri að breidd og hæð og höfðu þeir farið tiltölulega auðveldlega í gegnum járnnet, sem búið er að setja upp við hlið vegarins til varnar grjóthruni sem þessu.

Ekki þarf að spyrja að leikslokum ef bíll hefði verið á ferðinni um hlíðina þegar steinarnir ultu.