Félag fanga á Litla-Hrauni, AFSTAÐA, ætlar að beita sér enn meira en áður í baráttunni við fíkniefnanotkun. Þeir hafa staðið að undirbúningi vímuefnaverkefnis sem áætlað er að hrinda í framkvæmd í haust. Þetta kemur fram í nýjasta tölublaði Tímamóta, fréttablaði fanga á Litla-Hrauni.
Í greininni segir að þrátt fyrir innilokun og erfiðar aðstæður verði ekki hjá því litið að fangar bera sjálfir ábyrgð á neyslunni í fangelsinu. Félagið telur tímabært að fangar axli þá ábyrgð og hefjist sjálfir handa við að sporna gegn almennri neyslu. Samstarf verður hafið við ýmsa í tengslum við fíkniefnaverkefnið, meðal annars fangelsisyfirvöld og erlend samtök sem starfað hafa á þessum vettvangi með góðum árangri.
